Su runaghe Don Micheli
Su runaghe de Planu o de Don Micheli, chi segundu Giuanne Ippanu, cun runaghe Attentu e runaghe Sa Surzaga, fit in sa lacana de Piaghe, a poi chi an fattu su fraigu de sa “Fundassione Santu Giuanne Battista”, est bennidu a s’agattare intro de sa bidda.
A una turre, est fattu cun contones de pedra bia postos a filadas derettas. At un’iscala iscovacada chi si pesat cun tres gradinas, unu niciu de corridore e un’apusentu tundu cun tres nicios e unu pius minore pius in altu.
S’est cussevadu no male meda unu cantu de sa turre chi at 12,50 metros de diametre; sos muros sun de battor metros. S’intrada de sa turre est posta tra s’ala soriana e in ue calat sole. At una trae crebada de ruiadis.
A s’apusentu tundu, chi at unu diametre de 3,8 metres, si bi podet entrare dai unu passaritzu longu 4,5 metros, tupadu pro duos metros (Fiore, 1966). Fintzas custu runaghe l’at istudiadu e b’at iffossadu Giuanne Ippanu. In su 1874, s’archeologu b’at iffossadu a istratas pro bi fagher un’iscavu istratigraficu. Falendebei de duos metros b’an agattadu firchinidas de vasetas, cun manigas de frommas diferentes e una fromma iffossada in mesu; a unu metru a in basciu b’aiat firchinidas de istezos, ossos de omine e una tumba in ue b’aian mortos chi los aian bruiados (Fiore, 1966).
In su 1960, cando b’an iffossadu, cun su metodo de sas istratas falende fintzas a duos metros, Maetzke b’at agattadu, in s’istrata pius bascia, firchinidas de istezos de terra lios e tribagliados, unu pugnaleddu de brunzu, paritzas firchinidas de sa trifide de unu furreddu, paritzas cassaloras, tribagliadas a ippiglione, e cichereddas chi dian poder esser de unu tempus chi andat dai su de bindighi a su de noe seculos (Fiore, 1966).