A poi de sa morte sua
In Piaghe, sas tzerimonias pro sos funerales de i custu omine illustre chi fit mortu, las at fattas su Comune in Cheia Manna e in Municipiu, su 20 de maiu de su 1878 cun sos compaesanos suos chi fin cummovidos meda.
Su teologu avocadu Bucianu Conzatu, sindigu de Piaghe, at fattu ponner iscrissiones, pro onorare s’istudiosu illustre, in sa gianna de fora de su municipiu, in sa gianna de fora de cheia, a oios a s’altare, a dresta de su tumulu e a oios a sa gianna de sa cheia. A poi de sa funtzione religiosa, in ue b’aiat zente cummossa, sa giunta comunale, su sindigu, sos parentes de su calonigu e una bona parte de sos piaghesos sun andados a Municipiu in ue an imbinzadu a leger sos discussos pro su funerale. Su primu a faeddare est istadu su sindigu; a poi b’at apidu unu discussu chi at legidu su nebode, su teologu Frantziscu Ippanu, retore de Borutta, un’ammentu de s’avocadu Frantziscu Angioni Contene, unu discussu de s’avocadu Zuseppe Uleri e, pro finire, unu sonetu nadu dai su notariu Bainzu Me Fois. In sa tzerimonia pro sa morte b’aiat zente meda pruite su grande calonigu fit dodadu meda in sa cultura e pruite, apoi mortu, a sos cumpaesanos suos lis at fattu bider su bono coro sou. Si cheret faeddare de una eredidade, lassada a su Comune de Piaghe: lasso a su municipiu de Piaghe 1000 francos pro chi los impreet comente cheret, est a narrer pro accontzare calchi cosa de sa bidda, funtanas o caminos. Sa notiscia s’agattat in d unu documentu chi chie est iscriende at agattadu in s’archiviu istoricu comunale de Piaghe.
In su 1912 Piaghe at ammentadu un’attera bolta custu istudiosu. Su 12 de Sant’Andria su sindigu, s’avocadu Ziromine Mula, sos assessores Antoni Maria Pirastru, Giommaria Pulina Casula, Giuanne Sini Tedde e su segretariu agiuntu, avocadu Giomaria Lei Ippanu, an fattu unu comitadu pro inaugurare unu bustu de mamaru, de fattura fine meda, fattu dai Sartorio, e chi fit su retratu de su grande istudiosu, chi su dutore Gio. Maria Ippanu, mortu annos in anti, aiat lassadu a su Comune cun cantu aiat. Pro fagher una cosa de no poder immentigare, an pessadu de fagher, sa matessi die, una festa de beneficentzia, e cun d una chirca in mesu a sa zente chi pius aiat pro accabidare dinari meda pro lu dare a sos pius poveros de sa bidda.
Sa die assignada, su 29 de Sant’Andria, b’at apidu zente meda. Sa popolassione, su sindigu e sa giunta, in su piatzale de cheia an retzidu sas autoridades politicas, de cheia e univessitarias, lompidas fintzas a Piaghe pro custa ocasione. In particulare bi fin: su senadore Filippu Garavetti, su professor Antoni Fais, s’avocadu Pedru Sanita Branca, s’avocadu Lei Ippanu, su professor Soro Delitala, sos de sa commissione provintziale pro sos monumentos, s’avocadu Cambone pro sa subraintendentzia a sos monumentos, paritzos assessores e rapresentantes de sos comunes de Tzaramonte, de Fiolinas, de Codronzanu, de Osile. B’aiat fintzas avocados meda, zente de sos Ippanos e rapresentantzias de sos istudiantes de s’Univessidade de Tatari, de su Liceo Azuni de Tatari, de s’Istitutu Tennicu e de su Convittu Natzionale. Sa tzerimonia pro dare su monumento l’an fatta in Municipiu in ue, in mesu a sas atteras cosas, an devidu leger telegrammas in ue pessonalidades importantes aderin. Su bustu como s’agattat in sas iscolas elementares de Piaghe.
Su 21 de lampadas de su 2003, si trattat de unu seculu a poi, in sa secustantzia de sos duos seculos dae cando est naschidu, Piaghe at ammentadu su tzitadinu sou cun d una die de istudiu, un’annullu filatelicu e una tzerimonia uficiale, chefida dai su Sindigu Maria Gavina Masela e dai s’amministrassione Comunale, pro sa dedica de una targa de ammentu, iscritta in sardu, in sa variante de Piaghe, dae sa professoressa Giuanna Maria ’e Ledda, de Piaghe e istudiosa de limbistica sarda e pro inditulade a su Calonigu sa Biblioteca Comunale.
Custa est sa traiscrissione de sa targa de otone, posta a s’intrada de sa biblioteca:
COMUNE DE PIAGHE
A SU CALONIGU GIUANNE IPPANU (1803-1878), PIAGHESU FAMADU, IN SOS DUGHENTOS ANNOS DE SA NASCHIDA, PRO S’AFFRISSIONE SUA PRO S’ISTORIA, PRO SA LIMBA, PRO S’ARCHEOLOGIA, PRO SU PATRIMONIU CULTURALE DE SA SARDIGNA NOSTRA.
PIAGHE, VINTUNU DE LAMPADAS DE SU DUAMIZA E TRES
S’AMMINISTRASSIONE COMUNALE