Sas Scoperte
In su 1865 bessin Scoperte in undighi liberos. In custu modu s’istudiosu at chefidu fagher cagliare sas criticas chi aian fattu a su Bullettinu chi naraian chi fit troppo pieno di carte di Arborea.
Sas Scoperte cheren fagher a bider sos monumentos, sas notiscias, cun d unu modu chi at pius a ite fagher cun su chi cumbinat. Bidimus unu fiotu de archeologos o tumbarolos bessidos a primu chi Giuanne Ippanu dirigiat, zente chi si moviat in sa cussoza e chi dan infrommassiones a su calonigu illustre de totu sos guastos chi si verificaian. Pro reparare in tema, tantu pro narrer, su sindigu de Turava nd aiat fattu betare s’ultimu pianu de su runaghe de Santu Antine (runaghe importante chi fintzas Carlo Alberto l’aiat bidu) pro impreare sas pedras pro fraigare un’abbadozu pro su bestiamine.
Giuanne Ippanu at fattu iscobertas meda. Bisonzat de fentomare sa Tres limbas de Santu Nigola Gerrei, una lapide cun d una iscritta in tres limbas (latinu, grecu, feniciu) chi in s’iscrittu latinu ammentat sa dedica, in s'ala de fundu de un’istatua, fatta dai su cabu de sas salinas de Carales a su santuariu de Esculapio chi como est arribada in su museu de Torino, e sa taula de Esterzili, una lastra manna de metallu in ue b’at iscrittu una sententzia de su guvernadore de sa Sardigna, in su 69 a poi chi fit naschidu nostru segnore, e chi cundennat sos pastores sardos Galilenses de sa cussoza de Esterzili a che bessire dai sas terras de sos massaios chi fin bennidos dai sa Campania. Est unu documentu importante meda pruite nos dat a ischire de sas disamistades tra sa zente chi fit bennida dai fora (massaios) e sa de su logu (pastores). Unu iscontru de culturas diferentes fra zente chi deviat andare dai unu logu a s’atteru, de su totu o in parte, e zente chi istaiat frimma in su logu in ue b’aiat sa terra de tribagliare.
Ammentamus sas Scoperte chi Giuanne Ippanu at fattu bessire:
- Ammentu in punta de paritzos idoletos de brunzu agattados in su villagiu de Teti e iscobertas archeologicas fattas in s’isola in totu s’annu 1865, Cagliari, 1866;
- Ammentu in punta de sa tzitade antiga de Gurulus Vetus, a die de oe Padria, e iscobertas archeologicas fattas in s’isola in totu s’annu 1866, Cagliari, 1867;
- Ammentu in punta de una moneda, fintzas a oe una ibia, de Nicolau Doria conte de Monte Leone e segnore de Casteddu Genovesu e iscobertas archeologicas fattas in s’isola in totu s’annu 1867, Cagliari, 1867;
- Ammentu in punta de una lapide de lacana agattada in Sisiddu, a cutzu a Cuglieri, e iscobertas archeologicas fattas in s’isola in totu s’annu 1868, Cagliari, 1868;
- Ammentos in punta de sa abbadia de Bonarcadu e iscobertas archeologicas fattas in s’isola in totu s’annu 1869¸ Cagliari, 1869;
- Ammentos in punta de sa catedrale de Otana, chi est una cheia antiga, e iscobertas archeologicas fattas in s’isola in totu s’annu 1870, Cagliari, 1870;
- Iscobertas archeologicas fattas in s’isola in totu s’annu 1871, Cagliari, 1871;
- Ammentos in punta de sa catedrale de Galtelli, chi est una cheia antiga, e iscobertas archeologicas fattas in s’isola in totu s’annu 1872, Cagliari, 1872;
- Iscobertas archeologicas fattas in s’isola in totu s’annu 1873, Cagliari, 1873;
- Iscobertas archeologicas fattas in s’isola in totu s’annu 1874, Cagliari, 1874;
- Iscobertas archeologicas fattas in s’isola in totu s’annu 1875, Cagliari, 1875;
- Iscobertas archeologicas fattas in s’isola in totu s’annu 1876, Cagliari, 1876.