Sas lacanas de Quirriu Altu fin via Mazini, vico Siotto, s’ala de subra de via Roma, sos primo trettos de via Amsicora e de via Tempiu e unu trettu de Corso Reina Margarida (abbaida sa planimetria).
Custu fit su bighinadu pius importante de Piaghe pruite bi fit Corte de Palatu, sa chi oe si narat piazza Tola, in ue bi fit su palatu de su marchesi de Laconi, barone de Piaghe. Custu fit unu puntu vidale meda e in ue bi giraiat zente meda de sa bidda: sas autoridades cumandadas dai su barone in sos apusentos de su palatu bi faghian sas sententzias. Su palatu a poi l’an impitadu comente presone mandamentale. Su chirriu podiat fintzas esser ligadu a su sambenadu de una pessone. Su 15 de martu de su 1852, difati su sindigu de su comune de Piaghe, Prammeri Fadda, aiat dadu s’ordine a su signor Cunco Giuseppe (chi esigiat sos affoghizos de su distretu de Fiolinas), de pagare dai sa cascia propriu de su comune a sa mama de titta Falche Maria Savazina de Piaghe, ses francos noos e 72 centesimos pro su sustentu e pro s’ippoglia chi aiat dadu a sa burda Maria Sevadora Chirriu Altu. Ducas cussa povera burda aiat leadu su sambenadu dai su logu in ue l’aian agattada: Chirriu Altu.
PIATTA
PIATTA fit propriamente cussa banda de sa bidda chi andaiat dai Cortile de Cheia, sa piatta de oe, e su bicu de via Reina Margarida e su trettu chi moviat dai s’intrada de Corso Giuanne Ippanu e lompiat fintzas a su bicu Reina Elena.
CORTILE DE CHEIA est sa Piatta Santu Pedru de oe.
Su nomene, chi si podet pessare chi benzat dai sa presentzia de s’oratoriu de Santa Rughe, abbratzaiat su trettu chi finiat, a un’ala, in sa cheia chi aiat cussu nomene, e a s’attera, in Funtana Manna. In sa planimetria de s’abitadu de Piaghe antigu no s’agattat custu nomen de logu pruite pro su pius, pro no narrer de su totu, in sos documentos chi si sun abbaidados si faeddat de i custu bighinadu nende: su chirriu de Santa Rughe o de Funtana Manna e fintzas, meda de pius, SU BIGHINADU DE LODÈ.
SU QUIRRIU DE GIOSSO O SU PADRU DE GIOSSO
Fit sa parte forana de sa bidda chi leaiat fintzas Quirrios de Crastos de Sardinia.
SU QUIRRIU DE CRASTOS DE SARDIGNA
In custu bighinadu b’aiat una carrela, chi no s’ischit cale est, Ardareddu. No ischimus in cale trettu pretzisu fit ma ischimus ibia chi su 3 de martu de su 1855, in su trettu chi si naraiat Crastos, si sun abboiados su zuighe de su mandamentu de Piaghe, Pascale Soddu, e sos duos fraigamuros Pascale Pinna e Matteu Sanna Piu pro sestare e perissiare s’isterrida de sas duas piantas de domo chi aiat dimandadu su piaghesu Matteu Fiore. S’isterrida de su terrinu, pius a mancu 39 metros quadros, fit propriu in Crastos a oios de sa carrela chi si naraiat Ardareddu.
SOS CHIRRIOS DE CRASTOS DE SARDIGNA andaian dai ue oe semus intro de bidda a su trettu a cutzu a Domus Maiore.
CRASTOS DE SARDIGNA est sa chi como si narat via Luisi Cambone.
Su nomene de custu bighinadu benit dai sa cheia de Santa Caderina, sa cheia manna de sa biddighedda medievale de Muskianu, dai ue sa zente si ch’est avviada de su totu in anti de su 1425, chi fit a dai segus de totu su chi b’est inghiriadu a sa cheia Manna de Santu Pedru. Su logu pius importante de custu bighinadu fit sos Ulimos. Custu nomene faghet a cumprender chi in cussa banda bi deviat aer ulimos meda.
SU CHIRRIU DE SANTA CADERINA leaiat su trettu chi inghiriaiat Piazza de Castro.
SOS ULIMOS fin intro de su Chirriu de Santa Caderina e d est sa Piatta de Castro de oe.
SU CHIRRIU DE SANTU MATTEU O SU MONTE
SU CHIRRIU DE SANTU MATTEU O SU MONTE si isterriat dai via Mazzini, bicu Siotto e dai su primu trettu de Via Martini fintzas a sa cheia de Santu Matteu.
Sas carrelas chi leat a die de oe custu bighinadu sun: bicu Sioto, via Siotto, via Santu Matteu e bicu Santu Matteu, sa prima intrada de via Martini (chi li naran Giardinu) e su primu trettu de via Brigata Sassari. Si podet cumprender comente cussu trettu de sa bidda epat leadu su nomene dai sa cheighedda, como fora de bidda, de Santu Matteu, fraigada in anti de su 1649 e posta in sa pala soliana de su monte vulcanicu chi li dat su nomene.
SU CHIRRIU DE SANTU TIMIDEI andaiat dai su de duos trettos de via Eleonora de Arborea sighende in via Roma e in via Arrio fintzas a sa via Tzaccaria lende fintzas custas carrelas de oe: via Don Felis, bicu Don Felis, via Santu Timidei, sa cheia de Santu Timidei e su de duos trettos de via Eleonora de Arborea (abbaida sa planimetria).
SU CHIRRIU DE SANTU VALENTINU andaiat dai su bicu Reina Elena e lende via Eleonora de Arborea, via Roma e via Minerva, abbratzaiat su chi oe est Palu Virde, su primu trettu de via Eleonora, via Arrio, su de duos trettos de via Minerva, sa via Reina Elena e su bicu Reina Elena (abbaida sa planimetria).
PALU VIRDE est sa piatta de Palu virde de oe.
SU CHIRRIU DE CUMBENTU leaiat su nomene dai su Cuvventu de sos caputzinos, da in intro in intro cun sa cheia de Sant’Antoni, cumpridu in su 1659. Isse leaiat su trettu chi inghiriaiat su cuvventu (su primu trettu de via Minerva, via Iosto Satta, via Cuvventu, via Oberdam, via Sauro, via Pedru Sale), Paris de Cumbentu e su padru de sa tanca de su canonigu (Calonigu).
PARIS DE CUMBENTU est sa piatta de su Cuvventu.
SA TANCA DE SU CANONIGU aiat a lacanas sas carrelas de oe: via Padre Nicolò, via Laredu, Via Pedru Sale, via Armando Diaz.