SOS BIGHINADOS
In sa lacana tra Chirriu Altu e su Chirriu de Santa Caderina bi fit su bighinadu de MALU PENSU, sa via Azuni de oe.
Bi fin poi:
SU BIGHINADU DE DOMOS NOAS chi, creschidu in su de 18 seculos in su logu chi naran Chirrios de Crastos de Sardigna, leaiat s’ala de s’abitadu chi aiat pro lacana via Diana e unu trettu de via Martini.
GIARDINU est su primu trettu de Via Martini.
SU DE MANUNTA fit a lacana cun Giardinu e leaiat sas carrelas chi oe si naran via Manunta e via Arnosio.
SU BIGHINADU DE BIDDA NOA est creschidu in su de 17 seculos in cussa banda connoschida comente Chirrios de Crastos de Sardigna e leaiat via Villanova, via Iosto e un’ala de via Sarra. Fit a lacana cun SU DE MANUNTA.
SU DE ANTONI PINNA est s’ala de subra de via Pedru Sale (abbaida sa planimetria).
SU BIGHINADU DE LODÈ fit su trettu de via Pedru Sale a lacana cun su de Antoni Pinna e si isterriat dai via Tzaccaria fintzas a via Minerva (abbaida sa planimetria).
SU DE DON FELIS fit a lacana cun Cortile de Cheia e leaiat sas carrelas chi oe si naran via Don Felis e via Mannu (abbaida sa planimetria).
TINNIAS fit in s’oru de sa bidda e fit a lacana cun s’ultimu trettu de Carrela Longa. Pro l’assemprare: sas ultimas domos de su de duos trettos de Corso Reina Margarida (abbaida sa planimetria).
SU BIGHINADU O CUSSOZA DE LAREDU si isterriat in su primu trettu de via Padre Nicolò (abbaida sa planimetria) e fit a lacana cun sa tanca de su calonigu.
B’aiat fintzas atteros bighinados chi ancora no s’ischit in ue fin: sa carrela chi li naraian Frantzischeddu, su de Madau.
